അനൂപ് ചന്ദ്രന്
കുതിപ്പിച്ചില്ല മുന്നോട്ട്
തലക്കെട്ടിന് ഇടഞ്ഞ മോട്ടോര്
വാക്കിന് ഫ്യൂസുകളൊന്നൊന്നായണഞ്ഞുവോ
വരികള്ക്കിടയില് പിണങ്ങിയോ
ഡൈനാമോയും ബാറ്ററിയും
തിളച്ചുകത്തിയോ അതിവികാരത്തിന് റേഡിയേറ്റര്
പൊട്ടിയോ താളത്തിന് ടൈമിങ് ബെല്ട്ട്
കണക്കുകള് തെറ്റിയ ഛന്ദസ്സിന്
പിസ്റ്റണുകള് ഞെരുങ്ങിയോ
കരിഞ്ഞുവോ സര്ഗ്ഗ സ്പാര്ക്ക് പ്ലഗ്ഗുകള്
സന്ധികളില് വയറുകള് മുറിഞ്ഞുവോ
വൈദ്യുതി പടരാതെ വിഘടിച്ചുവോ
ഉപമ ഉല്പ്രേക്ഷയില്
ഒഴുകും എണ്ണ വരണ്ടുവോ
തേഞ്ഞ ബയറിങ്ങില് മൌണ്ടിങ്ങില്
പരുക്കനായ് മൊത്തം ഘടനയില്
കവിതയുടെ
നാലുചക്രവാഹനം നടുറോഡില്
ചുട്ടവെയിലത്തു കിടക്കുമ്പോള്
ഉള്ളിലിരിക്കും ഞാനും
പുറത്തു പായും നിങ്ങളും
ഒരേ വിചാരത്തില്
ഒരേ ചോദ്യത്തില്
കുറേ കാരണങ്ങളുടെ
ഏതെങ്കിലുമൊന്നില്
ഒരുപോലൊരുപോല്
ഒറ്റചക്രമുള്ള വണ്ടിയായിരുന്നേല്
സംതുലനത്തിന്നായ് നൃത്തം തീര്ത്തേനെ
ഒറ്റക്കാലില് മണ്ണിലൂന്നി കുതിപ്പിച്ചേനെ
ചെറുദൂരങ്ങള്
വഴികളില് പതിഞ്ഞേനെ
ആഴമുള്ള ചാലുകള്
വീണുമെണീറ്റുമിഴഞ്ഞും
മെല്ലെയെങ്കിലുമെത്തിയേനെ
ചത്തു കിടപ്പില്ലായിരുന്നു പെരുവഴിയില്
ഊരിക്കളയണം ജീവിതത്തിന്
മൂന്നു ചക്രങ്ങളെ.
|
നന്നായിട്ടുണ്ട്